Nuwe ‘groen’ seël is hier
Articles
March 2010
Wineland Magazine - General
Nuwe ‘groen’ seël is hier
’n Nuwe sertifiseringseël, wat ook ’n wyn se IPW-status aandui, sal binnekort op die winkelrakke gesien word. Hierdie gekombineerde seël het voortgespruit uit ’n behoefte vanuit die bedryf om erkenning te gee aan produsente wat aan IPW (Geïntegreerde Produksie van Wyn) se vereistes voldoen.
DIE 2010-oesjaar dien as beginpunt van dié nuwe stelsel. Die sekretaris van die Wynen Spiritusraad, Hugo van der Merwe, verduidelik dat die huidige, smaller sertifiseringseël steeds gebruik gaan word vir wyne wat nie aan IPW-vereistes voldoen nie.
“Die nuwe stelsel is heeltemal vrywillig en word gebruik as middel om die Suid-Afrikaanse wynbedryf se aktiewe rol in om gewings vriendelike, volhoubare produksie ten toon te stel. Dit beteken egter nie dat wyn wat kortkom aan IPW se vereistes, nie gesertifiseer kan word nie.”
Die nuwe seël is ietwat groter as die standaard, smal weergawe, terwyl die slagspreuk “Integrity & Sustainability” saam met ’n simbool van ’n protea daarop verskyn.
IPW-bestuurder, Daniël Schietekat, verduidelik dat die nuwe seël ’n aanduiding is van volhoubaarheid, wat dan aansluit by die integriteit wat die Wyn- en Spiritusraad se sertifisering verseker. “Daar word verwag dat ten minste 50% van 2010 se totale wynproduksie met die nuwe seël gaan pronk. Dis werklik ’n inisiatief wat deur die bedryf self ontwikkel is. Ons is reeds wêreldleiers in volhoubare wynproduksie – die seël is maar net nog ’n manier om dit te wys.”
Onder: IPW-bestuurder, Daniël Schietekat.
As generiese bemarkingsliggaam is dit Wosa (Wines of South Africa) se verantwoordelikheid om die boodskap wat hier die seëls dra aan die internasionale mark te kommunikeer.
Wosa se kommunikasiebestuurder, André Morgenthal, verduidelik dat die nuwe stelsel eers binne die bedryf en dan plaaslik bekend moet wees voordat daar te veel in die buiteland “geraas gemaak word”.
“Ons moet leer uit die foute van ander wynlande, wat met die infasering van nuwe seëls verwarring onder verbruikers veroorsaak het. Wosa beoog om ’n ‘sagte strategie’ te gebruik om dit aan die breër wynpubliek oor te dra,” vertel Morgenthal.
Van der Merwe vertel dat die Wyn- en Spiritusraad se sertifi seringstelsel in 1972 reeds van stapel gestuur is. “Die silwer seëls soos ons hulle vandag ken, het gespruit uit die vereenvoudiging van ’n stelsel wat onder andere ’n “superieur” klas met ’n goue seël ingesluit het. Met die nuwe tweevoudige stelsel word daar weer beweeg in hierdie rigting, maar dié keer gaan dit oor volhoubaarheid en nie kwaliteit nie.”
Volgens Schietekat behoort die nuwe seëls diegene wat nog nie aan IPW-ver eistes voldoen nie, aan te moedig om ook die omgewingsvriendelike skuif te maak en uiteindelik ook die nuwe seël te gebruik. “Die meeste bedryfsreuse vereis reeds dat produsente IPW-akkreditasie verkry. Op grond van sekere aannames voorsien ek dat die nuwe seëls ná die oorgang-oesjaar, binnekort van 50% tot selfs 80% van die totale gesertifiseerde wyn sal verteenwoordig.”
