Mens bring nie sommer maar net ‘n vlagskip wyn uit, net om ‘n vlagskip te hê nie. Dit is iets wat oor die jare ontwikkel en verfyn word, totdat kwaliteit die wyn se vlagskipstatus vanselfsprekend bevestig. Dít volgens de Grendel se keldermeester, Charles Hopkins, wat onlangs dié kelder se nuwe vlagskip, die Rubaiyat, bekendgestel het. Met Merlot en Shiraz as die De Grendel se rooi uitblinkers, is dié Cabernet-gedrewe versnit ‘n interessante keuse as vlagskip – veral omdat Charles, wat een van Durbanville se grootste wyn-ambassadeurs is, die hoof komponent in die Helderberg area gaan werf het.

Hierdie wingerde was egter sy Terroir-speelgrond in die dae wat hy wynmaker was by Graham Beck, terwyl die feit dat al De Grendel se Cabernet aanplantings oorgeënt is tot ander variëteite boekdele spreek oor sy vertroue in koning Cab se potensiaal in Durbanville.

Cabernet maak 86% van die versnit uit, terwyl Malbec (11%), Cabernet Franc en Merlot (beide 1.5%) – alles wel van Durbanville – die versnit voltooi. Die eerste uitreiking is die 2006 oesjaar en hoewel dit nog meer as genoeg lyf het om te kan baat by verdere veroudering, is dié wyn reeds verbasend glad en – soos die mark dit deesdae vereis – gereed om direk van die winkelrak na die etenstafel te gaan.

Die eerste indruk van die Rubaiyat is intense bessievrug, terwyl 18 maande in nuwe vate sorg vir speseryagtige kompleksiteit en tipiese Cabernet tabakgeure, met ‘n verbasend soepel mondgevoel. As ‘n wyn wat gemaak is om met die groot menere soos Meerlust Rubicon, Kanonkop Paul Sauer en meer onlangs Waterford The Jem mee te ding, is ‘n prys van R240 aan die nederige kant.

Charles beklemtoon egter dat die prys nie vasgestel is om ‘n statement te maak nie en dat die wyn, eerder as die prys daarvan, ‘n indruk moet maak. “Jy moet onthou dat 75% van ons wynverkope aan die plaaslike mark is, met heelwat hiervan wat direk uit die proelokaal verkoop word. Ons wil nie onsself uit hierdie mark prys nie.”

Die gedig wat op die etiket verskyn, Omar Khayyam se Rubaiyat is ook al in Afrikaans vertaal – iets wat moontlik hierdie plaaslike mark sal beïndruk. As ‘n kwatryn kan elke reël ‘n variëteit verteenwoordig. Toe ek vir Charles vra of die versnit se samestelling beperk sal word tot hierdie vier druifsoorte, het hy net geglimlag. “Dit is die lekker ding van vir Sir David Graaf werk – hy gee my vrye teuels …”

 

Rubaiyat se vertaling deur CJ Langenhoven

Ek wou die Kroeg se Deur net opeskuif,

Toe kom daar, sag en stil soos Stoffies duif,

‘n Engel met ‘n Kruikie aangesweef.

Hy vra my om te proe. Dit was – die Druif!

 

You may like to read these:

Go Back
Shares