’n Boeremeisie uit Pretoria wat nog altyd lief was vir gasvrou speel en dinge mooimaak, stap vandag deur een van Suid-Afrika se mees gerespekteerde wynplase as die gasvryheidsbestuurder. “Ek was destyds baie meer van ’n rabbedoe as wat ek vandag is,” sê Lanél Smith (29), terwyl sy netjies met gevoude hande sit in ’n wit en blou strepiespak en nekserpie. Haar pad na Ernie Els Wyne is gebou op ervarings wat haar in ’n kort tyd laat groei het.

“Onthaal kom nog altyd soos ’n tweede natuur vir my,” sê sy. Dis ’n liefde wat sy in 2016 begin verfyn het toe sy na Stellenbosch verhuis het om gasvryheidsbestuur aan The Private Hotel School te studeer, waarna sy ’n diploma in funksiesbestuur verwerf het.

Haar belangstelling in wyn het eenvoudig begin deur in Stellenbosch te woon en te studeer. “Wyn is om elke hoek en draai,” sê sy. Tydens haar studies het die Wines of the World-kursus by die Kaapse Wynakademie haar belangstelling in wyn verder aangewakker, en met haar man wat ’n PhD in wynbiotegnoloog behou, is daar altyd ’n nuwe storie of wenk oor wyn om te leer.

Haar internskappe tydens haar studies het haar aan verskillende fasette van die bedryf blootgestel. By Lanzerac het sy onder die hoofbestuurder, Emile Langenhoven, en die kos-en-drankbestuurder, Johan van Zyl, se leiding waardevolle insigte in gasvryheidsbestuur gekry. Daarna het sy ervaring in funksiebestuur by Warren-Stone Weddings opgedoen en by Nooitgedacht-wynlandgoed tot verskillende projekte bygedra. Sy het ook as vryskutbloemis vir Fleur Le Cordeur in die Kaapse Wynlande gewerk, wat haar oog vir detail en kreatiewe estetika verder ontwikkel het.

Sy het in 2021 by Ernie Els Wyne as assistent-voordeurbestuurder aangesluit en daarna het dinge vinnig verander. Binne ses maande moes sy die rol van gasvryheidsbestuurder oorneem. “Ek is by die diep kant ingegooi en moes gou leer swem,” sê sy. Die oorgang was nie sonder uitdagings nie, maar dit het haar gevorm. “Ek moes op ’n jong ouderdom groot verantwoordelikheid dra, maar dit het my gehelp om aan myself te bewys dat ek dit kan doen.”

Onder haar leiding het die landgoed merkwaardige erkenning ontvang, insluitend ’n medalje vir uitnemendheid van Tim Atkin vir beste kelderdeurervaring in 2024. Maar haar fokus is nie by toekennings nie. “Ons meet ons sukses volgens ons eie standaarde,” sê sy. “Vir ons gaan dit alles oor die wyn en om ons wynmakers te eer.”

Hoe kry sy dit reg? Dis haar filosofie van diensleierskap wat die verskil maak, sê sy. Sy bemagtig haar span deur kennis en geleenthede vir groei te bied en bou ’n kultuur van samewerking. “Niemand in die gebou is te goed vir ’n taak nie,” sê Lanél. Die kennisvlak van die span is indrukwekkend. Kelners, byvoorbeeld, beskik oor WSET Vlak 2 of 3, en sy self is van plan om binnekort Vlak 1 te voltooi.

Die deel van haar werk wat sy die meeste geniet, is om wynfunksies te reël en ’n ruimte telkens op ’n ander manier te laat voel. “Ek hou daarvan om te sien hoe ons met ons venue kan speel om die beste moontlike ervaring vir gaste te skep,” sê sy.

Wanneer sy oor die toekoms van die bedryf praat, val haar fokus op samewerking. Sy glo wynplase moet mekaar as bure eerder as mededingers sien. Sy vertel van ’n warm Desemberdag toe hul ysmasjien gebreek het, en ’n buurplaas tot hul redding gekom het en die probleem opgelos het.

Met mentors soos Llewellyn Lambert, ’n selfstandige gasvryheidskenner wat haar inspireer om altyd na beter te streef, is Lanél ’n sprekende bewys van hoe talent en harde werk, gekombineer met die regte geleenthede, ’n wenresep vir sukses is.

Blitsvrae

  • Rooi, wit of vonkelwyn? Wit.
  • Iets of iemand wat jou altyd laat lag? Ek is bietjie van ’n sadis . . . ek sal lag vir iemand wat val.
  • Wie in die wynwêreld inspireer jou die meeste? My ou kollega, Amy Eslick.
  • Enige versteekte talente buite die wynbedryf? Blommerangskikking.
  • Een woord wat die SA wynbedryf beskryf? Soet-en-warm.

Sosiale media

Instagram:@lanel_smith

Facebook: Lanel Smith