Wynkommunikeerder en HanDrinksSolo.com-stigter Jono Le Feuvre glo dit is 'n belangrike manier om na nuwe wynverbruikers te kyk. Wyn kan makliker deel van mense se lewens word wanneer dit aansluit by iets wat reeds hulle belangstelling prikkel.

Dink aan 'n braai waar 'n bottel wyn tussen ander drankies op die tafel staan. Niemand verwag noodwendig dat jy iets besonders daaroor moet sê nie. By 'n formele wynproe kan dieselfde bottel egter 'n heel ander indruk maak, veral as mense voel hulle behoort iets van wyn te weet. Die omstandighede waarin iemand met wyn kennis maak, glo Jono, is die sleutel om verbruikers in die wyn-wêreld te verwelkom.

Ouderdom of hoeveel wyn iemand drink, vertel ook nie noodwendig die hele storie nie. Meer as die helfte van die gehoor op Jono se HanDrinksSolo YouTube-kanaal is jonger as 44, terwyl daar ook heelwat kykers tussen 18 en 24 is. Hy kyk eerder na wat mense reeds interesseer, en probeer wyn deel van hulle wêreld te maak.

Geleentheid vir konneksie

Film is een so ‘n voorbeeld. Omdat dit 'n persoonlike belangstelling is, gebruik Jono gereeld rolprentverwysings in sy wynvideo's. Iemand wat min van wyn weet, maar baie van films, het dan reeds iets in gemeen. Wyn hoef dus nie altyd die eerste aanknoping tot ’n gesprek te wees nie. Jono glo verbruikers moet eers begin belangstel in wyn voordat tegniese kennis opgebou kan word. Dit kan by 'n filmgeleentheid opduik, deel van 'n musiekaand wees of bloot die wyn wees wat iemand tydens 'n spesiale geleentheid drink.

Dit beteken nie dat wyn eenvoudiger gemaak moet word om nuwe mense te lok nie. Inteendeel. Jono glo premiumprodusente hoef nie noodwendig almal te probeer bereik nie. Mense wat reeds nuuskierig is, sal gebruik maak van die geleentheid om hulle belangstelling verder te ontwikkel.

’n Vars benadering

Wynplase het dikwels interessante stories wat maklik verlore kan gaan wanneer die fokus net op die wyn is. 'n Ongewone of unieke invalshoek kan soms meer mense se aandag trek as 'n lang verduideliking oor hoe 'n wyn gemaak word.

Dieselfde beginsel word by Jono se eie proeë gebruik. Wyne word blind bedien en deelnemers kan hul kommentaar anoniem deur middel van 'n QR-kode indien. Daar is dus minder druk om die "regte" antwoord te gee. Selfs 'n wynmaker kan aan so 'n proe deelneem sonder om noodwendig te weet dat sy of haar eie wyn in die glas is.

Wanneer mense nie voel hulle word getoets nie, is hulle meer geneig om hul mening te gee en vrae te vra. Die gesprek kan dan begin by wat hulle spontaan opval, eerder as by wat hulle dink hulle behoort te weet. Hierdie perspektief bied interessante moontlikhede vir die wynbedryf.

Nuwe verbruikers hoef nie altyd deur slegs wynkennis gelok te word nie, soms is daar 'n ander belangstelling wat die deur kan oopmaak. Volgens Jono is daar geen tekort aan interessante stories in Suid-Afrikaanse wyn nie. Die uitdaging is om seker te maak mense kry die kans om hulle raak te loop.